29 Gusht 2025

Sekretari i Shtetit, Marco Rubio pritet të udhëtojë në fillim të shtatorit në Ekuador, një shtet ku kartelet shqiptare të drogës po bëjnë kërdinë.

Në një njoftim zyrtar të Departamentit të Shtetit thuhet se qëllimi i vizitës do jetë neutralizimi i kërcënimeve që vijnë nga narko-terrorizmi.

Ndërkohë gazeta ekuadoriane ‘Primicias’ thekson se pjesë e diskutimeve do jetë edhe çmontimi i karteleve të drogës.

“Njoftimi vjen pasi Rubio deklaroi më 26 gusht se Shtetet e Bashkuara kanë krijuar një koalicion rajonal për të luftuar trafikun e drogës, dhe Ekuadori është pjesë e kësaj iniciative.

Gjatë mbledhjes së kabinetit të SHBA-së, e cila u transmetua drejtpërdrejt nga mediat, Rubio tha se Shtetet e Bashkuara po ndërtojnë një koalicion ndërkombëtar kundër trafikut të drogës, dhe konfirmoi se Argjentina, Paraguai, Ekuadori, Guajana dhe Trinidad e Tobago janë tashmë pjesë e këtij grupi.

Ai shpjegoi se po ndërtohet një rrethim gjyqësor, ushtarak dhe diplomatik kundër diktaturave që trafikojnë drogë drejt Shteteve të Bashkuara dhe Evropës, duke aluduar tek qeveria venezueliane, e akuzuar se drejton të ashtuquajturin “Karteli i Diellit”.

Ekuadori ka përmbushur narrativën diplomatike të Shteteve të Bashkuara duke shpallur Kartelin e Diellit si një grup terrorist. Për më tepër, qeveria e presidentit Daniel Noboa nuk e njeh Nicolás Maduro-n si president legjitim të Venezuelës.

Më shumë se 4.000 trupa amerikane, përfshirë rreth 2.000 marinsa, së bashku me aeroplanë, anije dhe raketahedhës, janë mobilizuar nga administrata Trump për të patrulluar ujërat pranë Venezuelës dhe Karaibeve për të luftuar kartelet e drogës,” shkruan gazeta.